阿史細細個成日都聽到一句說話—「年關難過」，一年有成三百六十五日，過年就係全年入面最難過嘅一關，呢句說話嚟到現代既係指經濟上嘅困難，又係指身體健康上嘅問題，但原來响古代，「年」其實就係一隻猛獸，冇咗佢就冇得過年。

提起「年」呢隻猛獸，就要由「熬年」呢個習俗講起。相傳喺太古時期，有一種喺密林之間生存嘅猛獸「年」，一直都以食人為生，而古時嘅人就發現，原來呢種猛獸每逢三百六十五日都係去到人口密集嘅地方食人，等到天光先會翻去密林入面。

由於當時嘅百姓太怕呢種猛獸，為咗唔令到自己死得不明不白，佢哋每年最尾嘅一日都會唔瞓覺直至天光，呢個習俗就叫做「熬年」，年出沒嘅果一日就叫做「年關」。

知道咗呢隻猛獸嘅習性之後，當時嘅人就諗咗一套度過「年關」嘅方法，每年嘅最後一晚，每家每戶都會煮好飯菜，熄火凈灶，封實屋內前後門，食完晚飯都唔瞓覺，並且點燃所有燈火，預求嚇走隻「年」。就係咁樣，除夕熬年守歲嘅習俗慢慢形成，之不過今時今日都冇乜幾戶會咁做。

圖片嚟自網絡