而家仲有冇小朋友派財神？

喺阿史細個果陣，新年係有好多傳統習俗，其中一樣就係叫做「派財神」，只限小朋友先可以派。以前嘅香港，「派財神」係一樣好普遍嘅習俗，周街都見到，只係唔知今時今日，仲有冇小朋友派呢？

講翻「派財神」，財神係神話上掌管財富嘅神仙，由小朋友派出嘅「財神」並唔係一個個嘅神像，而是一張兩吋乘一吋嘅紅紙，上面用毛筆寫住「財神」兩個字，寓意收到嘅人會有財運。至於點派呢？原來就係由小朋友每家每戶咁拍門，當戶主開門嘅時候，派嘅果個小朋友就會大叫「財神到～」，根據習俗戶主係唔會關門趕財神走，反而係要派利市接財神。大人就希望來年發大財，而小朋友就即時發小財。

講開又講，其實係年三十晚前「派財神」仲有混合埋另一樣習俗—「賣懶」，就係當你屋企個小朋友唔聽話唔勤力，就可以將一張寫住「懶」嘅紅紙混入去財神入面，從而送走個懶，聽落都真係幾有趣。之不過，呢兩樣傳統習俗近年好似越嚟越少見。