近日，世界各地都受到新型冠狀病毒嘅威脅，無數嘅醫護人員喺前線同疫症搏鬥，呢份精神值得所有人尊敬。而提起醫護人員，南丁格爾就絕對係當中嘅佼佼者。

南丁格爾喺英國一個上流社會家庭入面長大，接受高等教育，而喺當時嘅社會環境嚟講，護士呢份職業係被認為係「唔見得人」，但南丁格爾依然選擇唔理父母嘅反對，從事護士呢份職業。

喺19世紀50年代，英國、法國、土耳其同埋俄國進行咗克里米亞戰爭，單單係英國戰地軍人嘅死亡率就已經高達42%。而當時南丁格爾就主動申請去做戰地護士，帶同38個護士一齊到戰地醫院,令到死亡率大幅下降。

南丁格爾因為經常拎住盞油燈去巡房照顧病人，於是就被當時士兵叫佢做「拎住燈嘅女神」。戰爭結束之後，南丁格爾被推祟做民族英雄，仲得到政府4000英鎊嘅獎勵。佢用呢筆獎金去開創世界上第一間正規護士學校，畢生培養護士。

「燃燒自己，照亮別人」就係南丁格爾所倡導嘅人道主義精神，呢位一生致力建構護理學嘅護士，响1910年8月13日與世長辭，終年90歲。每年嘅5月12號就係國際護士節，係用嚟紀念南丁格爾祟高嘅精神。

原圖嚟自網絡