早幾日政府就宣佈會將饒宗頤文化館入面嘅「翠雅山房」用作隔離設施,並喺數日之內清空「翠雅山房」。唔講唔知,原來饒宗頤文化館嘅所在之處,以前有過好多唔同用途嘅建築物,「豬仔館」、檢疫站、監獄、傳染病院通通都做過。


喺未有饒宗頤文化館之前,呢塊土地1895年果陣係用嚟做九龍關嘅深水埗分廠,叫得關廠就當然係負責所有鴉片關稅同埋監察走私活動。而過咗9年之後,九龍關廠就被改為華工屯舍,又叫做「豬仔館」,係運送、販賣、暫住嘅地方。


而去到1900年代初,由於多種傳染病喺華南地區爆發,霍亂、天花等,令到當時嘅政府買咗華工屯舍舊址、興建一座座紅磚屋,加建大石圍牆,凡係經過荔枝角渡口,都要喺道進行檢疫,呢個就係荔枝角檢疫站。


當傳染病結束之後1921年呢道就被改建成監獄,但1938年傳染病再次肆虐,荔枝角監獄嘅一部分就改做荔枝角 (霍亂) 醫院,其後更加用嚟醫治麻瘋病患者同埋肺結核病人,去到1975年先變成療養院用途,主要接收精神病病人同埋喜靈洲痲瘋病患者。


荔枝角醫院後來又變成護理院,喺呢項用途結束之後,2004年關閉後一直空置,去到2009年起被納入第一期活化歷史建築伙伴計劃,2014年搖身一變成為饒宗頤文化館。


原圖嚟自網絡