話咁快就到咗正月十五,亦即係華人社會所稱嘅「元宵節」,呢一日係新一年第一個月圓之夜,傳統以來都會喺呢一日食元宵、估燈謎、開燈會,因為過埋呢一日之後,就係春天嘅到來,亦係工作嘅開始,但到底呢個節日係點樣嚟?點解呢日先係情人節?

 

有關元宵節嘅由來,有好多唔同嘅講法,早期嘅兩個講法就有兩個,其中一個係「正月十五燃燈祭祀道教太乙神」,亦即係道教入面嘅天官誕,目的係為咗祈求來年豐收。至於另一個講法就係關於漢武帝為咗祭祀太乙神,响甘泉宮興建太一祠壇,並且正月十五黃昏開始燈火祭祀,慢慢演變成民間嘅張燈結綵習俗。呢個節日去到隋朝慢慢成形,去到唐宋就直頭變成重要嘅節日,唔少詩人都用元宵節為題寫落唔少優美詩句。

 

到底點解元宵節先係中國情人節呢?可能部分人都會覺得,七夕先係情人節,但牛郎織女本身就已經成為一對夫妻,七夕就以呢個傳說作為戴體,去表達夫妻之間果種不離不棄,而唔係情人或者戀人之間嘅感情。而元宵節就唔同,喺呢一日深閨入面嘅大家閨秀都可以出嚟賞燈、猜燈謎,於是就成為年輕男女相互結識、建立感情嘅日子。

 

原圖嚟自網絡