情人節起源 由唔畀人結婚開始？

又到2月14日，今日就係西方情人節，今時今日呢個又送花又送禮物嘅浪漫節日，原來真係講開有段故，一切都係由一個暴君唔畀一對對愛侶結婚而起。

相傳古羅馬有個出晒名嘅暴君克勞迪斯二世（Claudius II），由於佢認為婚姻同兒女私情係佢建立一隊強大嘅軍隊嘅障礙，於是佢就索性唔畀所有羅馬人結婚，就算結咗婚都要離。

咁果陣羅馬有唔少想結婚嘅愛侶，當時就搵到一個叫做華倫坦（Saint Valentine）嘅天主教神父。佢決心違抗呢個唔公義嘅命令，私底下幫有情人證婚，但好可惜最尾都係被發現。克勞迪斯二世捉咗華倫坦，喺獄中對他濫用私刑，毒打虐待，最尾响公元278年2月14日都係被處死，身首異處。為咗表揚神父呢種偉大嘅情操，教宗哲拉修一世（Pope Gelasius）就封華倫坦做聖人，而呢一日亦都被定為聖華倫坦日（St Valentine's Day）。