情濃大地

上次講過周海媚响《大鬧廣昌隆》演女鬼小芙蓉，而响九十年代個期佢仲响大台拍咗套經典民初劇，叫《情濃大地》。

《情濃大地》故事背景係民初嘅廣東一條村莊度，故事係講主角阿彩（長大後由周海媚飾）响村長關家做童養媳，後嚟就被迫下嫁村中一個窮鬼方樹根（羅嘉良飾），雖然係被迫嫁人但阿彩最後幫樹根捱出頭，後尾樹根仲做埋村長。但好景不常，關家大少關天福（艾威飾）响村中徵兵，樹根被徵召上戰場，但因為失咗憶所以幾十年都無返過條村。而守護條村幾十年嘅阿彩最後雖然見返樹根，但遇到嘅只係一個失咗憶嘅樹根。不過最後因為一個同心結，令樹根記返起幾十年前嘅呢位老婆。

講到呢套戲，阿史記憶中演得最出色嘅唔係周海媚或者羅嘉良，而係演作威作福嘅大奸角艾威，編劇利用呢個角色為套劇帶嚟兩個高潮位，一個係村民因糧租問題而作反，另一個就係做咗軍官返條村徵兵，呢個角色令當年唔少師奶咬牙切齒。