赤柱係軍事據點？

之前阿史介紹舂坎角炮台，今次就想赤柱呢個地方。關於赤柱嘅歷史阿史以前都講咗唔少，咁今次講乜嘢呢？話說阿史前個排去赤柱個陣，見到有架巴士寫住終點站係赤柱炮台。舂坎角又有炮台，赤柱又有炮台，到底係乜嘢一回事呢？

其實早响開埠以前，赤柱已經有重要嘅軍事據點，因為赤柱所在位置係响航道附近，所以响明清時期已經係軍事據點，好似清朝時赤柱已有個名為赤柱汛嘅營汛。至於炮台呢，就响1930年代，駐港英軍為防範日本入侵香港，於是就响赤柱一帶興建舂坎角炮台、黃麻角炮台、赤柱炮台等。而香港淪陷之後，日軍仲擴建赤柱炮台對付盟軍。

二次大戰之後，炮台一帶繼續成為軍營等軍事禁區，不過部分原來炮台位置就成為咗衛星訊號收發站。現時赤柱軍營由解放軍駐香港部隊管理，仍然屬於軍事禁區，所以市民知道嘅，可能只係赤柱炮台呢個巴士站名。