要鼓勵人最簡單直接當然係講「加油」,就連英文字典入面都有埋add oil,聽落好似好現代嘅講法,但原來「加油」呢個詞係起源自清朝,真係估你唔到。


「武漢城市之父」之稱嘅張之洞,史友們應該都會認識,佢爸爸張瑛就同「加油」呢個詞有莫大嘅關係,唔知史友們又知唔知呢。清朝道光年間,張瑛喺貴州做知府,佢本身已經係舉人,再經過「大挑」(即係為有舉人身份而冇官職嘅人而舉辦嘅科考)而轉輾之下嚟到貴州。


張瑛一生經歷唔少曲折,深知民間疾苦,佢上任之後唔單止為開修驛道,獎勵農商;積極編修府志、仲佢喺自己嘅俸祿入面拎出一筆錢,為嘅就係發展當地嘅教育事業,鼓勵後生仔好好讀書。


佢當時諗到一個方法,一個「添燈加油」嘅故事:每日晚上都派出衙差帶住油桶巡邏,只要發現有年輕人挑燈夜讀,就會幫佢哋油燈添油,先會叫一句「知府大人幫相公加油」,到加完油嘅時候仲會再送上一句祝福「府台大人祝相公讀書用功,獲取功名。」。而咁樣嘅舉動,足足維持咗十三年,而張瑛管轄嘅範圍入面,就出咗20幾位舉人、貢生8位、進士2位,「加油」一詞就慢慢被演繹成現代鼓勵人嘅意思。


原圖嚟自網絡