早幾日內地媒體就流傳住兩個差唔多姿勢嘅相，一張就係呢幾日浙沮省紹興市有一位三歲新冠肺炎康復者向醫護鞠躬嘅相，而另一張鞠躬相就係好出名、成百年前影落嘅歷史黑白相。內地媒體就形容，呢場係跨越百年嘅鞠躬禮，到底呢張黑白相當年係有咩寓意呢？

黑白相嘅其中一位相中人係一位英國傳教士，佢叫做梅藤更，而拍攝嘅地點就係當時叫做廣濟醫院，今日叫做浙大二院嘅地方，醫院嘅門前直頭將呢張相互相鞠躬嘅場景整成雕塑，梅藤更同廣濟醫院之間嘅關係，真係講開有段故。

呢張相雖然有好耐歷史，但都要去到2012年由浙江大學方新德博士去到英國國家檔案館查閱史料嘅時候，先至重新發現呢段歷史。由於1895甲午戰爭戰敗後簽訂咗《馬關條約》，杭州都因為咁而成為開埠城市，1897年英國開設咗駐杭州領事館，同時都有好多傳教士嚟到中國，梅滕更就係其中一位，佢同時都係一位醫生。

喺梅滕更夫婦去到杭州之前，其實廣濟醫院1871年已經由戒煙所改建成大方伯醫院，當時係由聖公會派出嘅傳教士主持呢項工作。至於梅滕更就要去到1881年先去到主持廣濟醫院，其後直到佢離任嘅四十幾年內，佢都致力將呢間醫院打造成「遠東最好嘅醫院」之一，事實亦都係成功嘅。

呢張黑白相，就係梅醫生喺巡查病房果陣喺走廊發生嘅一個場景，而據講原來呢位醫生喺街邊見到長者或者婦女都會同樣鞠躬致敬，跨越百年嘅鞠躬就係咁樣開始。

原圖嚟自網絡