剛才就同史友們講到保良局嘅同大台合作舉辦「白金巨星耀保良」，跟住就有史友叫阿史講多啲關於保良局嘅歷史，咁就當然冇問題啦！

保良局今時今日就係香港其中一個比較大規模嘅慈善團體，但最初嘅時候其實係主力遏止誘拐婦孺，而且仲為受害者提供庇護同埋教養，喺早年嘅香港社會嚟講係相當有威望。

喺19世紀末，香港仍然有唔少拐賣人口，逼良為娼嘅案件發生，1878年11月8日就有幾位有心人包括駐港客商盧賡揚、馮普熙、施笙階、謝達盛等人，聯名上書港督軒尼詩爵士，希望佢可以畀呢班商人集資懸賞，懲查拐帶，以除拐匪而安善良。冇幾耐之後，全港紳商再次集議，政府先順應民情，批准設立「保良公局」；其後再札諭巡理府、巡捕廳同埋漢務參贊組成委員會，主力查禁拐帶同埋起草相關方案，成件事由軒尼詩本人親自查閱，真係幾大陣仗。

早期嘅保良局並冇充足嘅經費，亦都冇固定會址，但就有東華醫院紳商大力襄助，當年就借出咗「平安」、「福壽」兩樓上層用作收容婦孺，所以早期亦都有「東保一家」嘅講法。而之後保良局得到廣福義祠嘅一塊土地，就喺果度建立會址，下面張黑白圖就係保良局喺上環嘅舊址喇。隨住香港社會環境嘅轉變，保良局亦都提供多元服務，以「保赤安良」為宗旨，繼續服務社會。

原圖嚟自網絡