「牛仔」、「下火」、「荔灣」、「擺尾」、「狀元」 大家又識唔識？

呢排天氣忽冷比熱咁，有時都會冇乜胃，呢個時候阿史就鍾意入粥店食返碗粥。貴為「中國飲食四大發明」之一嘅粥，自然就會有好多唔同形式嘅煮法，唔講近年新興嘅粥底火鍋，普通一間粥店都會有「牛仔」、「下火」、「荔灣」、「擺尾」、「狀元」呢幾款粥，史友們又估唔估到係乜呢？

有食開粥嘅史友應該都難唔到你哋，由最簡單嘅「牛仔」開始講啦！「牛仔」其實就即係碎牛肉粥，由於所用嘅牛肉切碎咗同埋比較瘦削，所以就叫做「牛仔」；至於「下火」，係因為呢隻粥真係有下火嘅功用，佢就係皮蛋瘦肉粥喇！

再深少少，就輪到「荔灣」，呢款粥入面既有魚肉，又有魷魚、蝦仁，咁多水產自然就係艇仔粥，而講到曾經好多艇仔嘅地方，當然就會諗起廣州荔灣，亦都相傳係艇仔粥嘅發源地。按差唔多嘅邏輯去諗，「擺尾」其實就即係魚片粥。至於最後嘅「狀元」，其實就即係及第粥，當中呢個名取自「三元及第」，講開就真係有段故，之後再史友們詳細介紹喇！