「無鑊耳，不嶺南」 原來唔係每家都整得？

早幾日阿史就同秘書行過沙田嘅曾大屋，秘書離遠見到屋上面嘅山牆就問，點解曾大屋嘅屋頂咁特別，成個茶壺耳咁樣？呢樣就真係嶺南傳統民居嘅建築特色，講開又有段故。

正所謂「無鑊耳，不嶺南」，當中所講嘅「鑊耳」其實就係下圖呢種結合裝飾同埋實用功能嘅鑊耳山牆，由於佢嘅形狀似足古代嘅大鍋同茶壺，所以又會叫做「鑊耳屋」、「雲牆」或者「茶壺環」。呢款側面睇起嚟好似一個「凸」字嘅山牆，除了最直接可以阻擋太多嘅陽光射入屋企同埋防止火勢蔓延，原來仲係身份嘅象徵。

喺明清年間，呢種山牆係家族身份嘅象徵，因為只有具功名嘅家庭先有資格採用；而且，鑊耳屋多數都係要用到打磨過嘅上乘青磚、石柱、石板砌成，再加上花蟲鳥獸磚雕同埋龍船脊，唔單止要有功名，仲要屋企大富大貴先整得起。成個鑊耳屋嘅工序入面，最高難度就係要用到「瓦筒壓頂、灰塑封固」，一有差池，間屋嘅氣勢就會唔同晒。所以就有人話，「鑊耳屋」係結合咗嶺南建築嘅高超功藝同埋頂尖嘅美學。