尋日阿史就同大家介紹到馬雲捐贈完防疫物資畀伊朗之後，就响微博打咗句「心憂波斯小昭安好」，係金庸迷都會明白。講完馬雲之後，阿史就諗起前排日本各界都捐過口罩畀中國，當中就展開咗一場詩詞、古偈語大會，阿史就揀咗當中幾個比較有意思嘅同史友們介紹下。

「山川異域，風月同天」就係出自日本國長屋王嘅一段佛偈，原句係「山川異域，風月同天，寄諸佛子，共結來緣。」，呢段事跡就被記載喺《東征傳》入面，係講緊公元8世紀嘅時候，日本長屋親王喺送畀大唐嘅千件袈裟上面，親上繡上嘅十六個字。成句嘅含意係雖然大家身處唔同嘅地方，睇唔到一樣嘅山川，但就可以欣賞一樣嘅明月。

「青山一道同雲雨，明月何曾是兩鄉」一句就係出自唐朝詩人王昌齡嘅《送柴侍御》，意思即係雖然大家身在唔同嘅地方，但面對嘅係一樣嘅雲雨，希望唔好因為地理嘅原因令到大家淡忘。

而最後最有意思嘅一句「豈曰無衣，與子同裳」就係出自詩經入面《國風．秦風．無衣》，如果就咁理解，意思大概係假如對方無衫着，我就同你着埋同一件戰裙。但其實係言簡意賅咁表達出有福同享、有難同當嘅情誼。中國詩詞、古偈語真係博大精深，短短幾句就隱藏住咁深厚嘅意思，阿史真係要寫個「服」字！

原圖嚟自網絡