早幾日阿史就同史友們介紹過幾款粥店簡稱，其中就有提到及第粥呢個名係取自「三元及第」，咁到底咩係「三元及第」呢？原來係指喺古代嘅科舉制度中，鄉試、會試、殿試都考取到第一名嘅考生，而呢碗「及第粥」嘅起源一直以嚟流傳住幾個講法，先唔講明朝狀元倫文敘同埋清朝廣東林召棠嘅故事，以下呢個講法阿史就覺得幾有意思。

相傳喺晚清嘅時候，有一位唔識字嘅肉販為咗可以方便計數，就專登向附近嘅私塾老師學咗三組字，分別係「豬肉」、「豬肝」、「豬粉腸」。後來就有人挑釁呢位肉販，叫佢不如去考下科舉啦。結果呢位肉販真係走咗去考，而且仲成功考到鄉試第一名。原來應屆考官係肉販嘅老師，見到考卷上寫「豬肉」「豬肝」「豬粉腸」就唔想佢空歡喜一場，於是就決定私底下幫佢作一篇交上去。

而去到會試，呢位老師擔心肉販再次亂嚟，就叫咗下科嘅考官如果再見到「豬肉」「豬肝」「豬粉腸」呢幾組字，就要將考卷作廢。但係，下科考官就誤會係乜暗號，又再幫肉販私下作一篇文，結果肉販又再考到第一。

去到最後嘅殿試，肉販本身係遲到入唔到考場，但就機緣巧合執到王爺嘅燈籠，門衛同埋考官見到之後，都即時放佢入嚟，以為佢係達官貴人後代。結果，考官又再次幫佢作文，肉販又再高中。之後佢返到鄉下，其他人都問佢憑乜野高中，肉販就答「豬肉」、「豬肝」、「豬粉腸」，於是後人就叫有呢三種材枓嘅粥叫做「及第粥」。

至於倫文敘同埋林召棠嘅故事，都係因為鍾意食呢款粥而扯上關係嘅。

原圖嚟自網絡