早幾日九巴就宣佈，會因應疫情嘅情況，為雙層嘅巴士加設橫趟式嘅車窗，希望可以加強到車內嘅空氣流通。阿史睇到呢單新聞，第一時間就諗起當年嘅「熱狗巴」，雖然有啲唔同，但真係估唔到過咗2012年5月9日最後一架「熱狗巴」退役之後，仲會見到有得開窗嘅雙層巴士。

講返「熱狗巴」，其實就即係相對有冷氣嘅「冷馬」，「熱狗巴」喺香港真係有一段好長嘅歷史。喺上世紀20年代，香港嘅巴士服務仲係起步階段，當時就已經有好多間唔同嘅公司營運巴士服務就好似啟德汽車有限公司、中華汽車有限公司、香港大酒店公司、九龍汽車有限公司等。而去到1933年，港府宣佈實施專利權制度之後，就第一次批出為期十五年嘅專營權，九巴就拎到九龍及新界巴士嘅專營權，至於港島就係由中巴奪得、香港大酒店就只可以經營一條來往淺水灣至卜公碼頭嘅路線。

香港嘅巴士發展喺二戰嘅時候大受影響，但亦都因為咁而迎來重大嘅改變。戰後人口不斷增加，除咗喺1947至1948年九巴同英國 Tilling-Stevens訂購咗50架單層巴士連同中巴108架巴士， 1949年九巴仲獲贈前後20架丹拿CVG5巴士測試香港行走雙層巴士嘅可行性，正式開展雙層巴士嘅時代！圖入面嘅呢款，就係九龍巴士保留嘅丹拿CVG5。

講開又講，其實早年嘅「熱狗巴」並唔係太熱，只係嚟到90年代氣候暖化，令到坐呢款巴士好似「坐緊蒸籠」咁，先至令巴士公司有將呢款巴士退役嘅打算。

原圖嚟自網絡