話說今日係3月14日，係白色情人節，喺呢一日曾經喺2月14情人節收過朱古力嘅男仔，如果對當日送朱古力畀你嘅女仔有意思，就需要喺白色情人節回禮畀對方。而呢個起源自日本嘅節日，原來係由一間菓子製造商推動出嚟。

時間返到1977年，當時日本福岡市博多區就有一間菓子製造商「石村萬盛堂」，呢間「石村萬盛堂」其實係1905年創立嘅，最初只係做傳統嘅日本甜品「雞卵素麵」，而用淨嘅蛋白亦都會用嚟整「鶴乃子」，亦即係軟心嘅綿花糖。

但「石村萬盛堂」嘅第三代傳人唔單止想平時整甜品，喺1977年佢就諗到，不如以3月14日為題，推動一個情人節後回禮畀愛人嘅日子，於是就創作咗一種新嘅「鶴乃子」。而慢慢呢一日亦都演變成送糖嘅日子，由於當時大部分嘅糖都係用砂糖整成，白雪雪嘅顏色就令到呢一日叫做「白色情人節」。

講開又講，後來朱古力製造商亦都發現到商機，就開始推銷埋白色嘅朱古力。唔知上個月收到朱古力嘅史友，今日準備好回禮未呢？

原圖嚟自網絡