粵式茶樓蓮香樓重開

著名嘅粵式茶樓蓮香樓早前就因為經營同業權問題，就需要休業整頓，冇幾耐就宣佈由一班老伙記接手，以「蓮香茶室」嘅名義運作，但幾日前就發生咗一件出人意表嘅事。呢件事就係顏氏嘅第四代傳人決定重新接管茶樓，而「蓮香茶室」亦都重新正名做「蓮香樓」，一下子呢間粵式茶樓好似變返以前咁。

香港嘅蓮香樓其實同廣州嘅蓮香樓有莫大嘅關係。蓮香樓嘅歷史最早可以追溯到清朝光緒年間廣州西關嘅一間婚慶餅店糕酥館，當時叫做「連香樓」嘅餅鋪，就因為做出嚟嘅蓮蓉酥餅太好食，而被稱為「蓮蓉第一家」，冇幾耐仲有一位叫做陳如岳嘅翰林學士親自幫佢哋改名叫做「蓮香樓」。蓮香樓慢慢就開始做埋茶市、晚市同埋筵席。隨後由廣州「茶樓大王」譚新義接手投資，發展到全國十幾間分店，至於香港嘅蓮香樓，就係由香港商人親自去廣州要求開嘅分店。

香港嘅蓮香樓第一代分店就係1927年8月10日設立喺皇后大道中，亦都喺威靈頓街襟江酒家開過，至於威靈頓街現址，就係1996年先搬到嘅。提起蓮香樓，唔單止係一間茶樓，仲係唔少歌影視作品嘅拍攝場地，《花樣年華》就最深入民心喇！