以天價藝術自資課程而知名嘅香港薩凡納藝術設計大學，近日就宣佈將會喺今年6月結束喺前北九龍裁判法院嘅分校，咁亦都意味住呢座二級歷史建築將會重新納入活化歷史建築項目入面。
講起前北九龍裁判法院，算得上係上世紀典型嘅公共建築。裁判法院喺司法架構入面屬於最低層級的法院，會審理多種簡易罪行。喺1942年之前，全香港就只有兩間裁判法院審理九龍區嘅罪案，分別位於上海街同埋加士居道，但後來上海街裁判法院1957 年拆卸，南九龍裁判法院就面對龐大嘅案件數量。1960年，為咗分流南九龍裁判法院嘅案件而興建嘅北九龍裁判法院，運作嘅44年間前後一共開設過10個法庭，仲試行過香港第一個交通法庭，認真有標誌性。而去到2005年，九龍區嘅裁判法院院由原來9 間合併為 6 間，北九龍裁判法院亦都喺2005年1月3日關閉。
作為第一批活化歷史建築夥伴計劃入面嘅建築，前北九龍裁判法院當然係好有特色啦！由花崗石磚砌成嘅七層大樓，當年搵咗巴馬丹拿建築及工程師有限公司負責工程，以比例上嘅平衡帶嚟視覺嘅衝突。成座建築貫徹咗新古典風格，用咗唔少以希臘做主題嘅精緻雕飾，特別可以喺六角花崗石樓梯同埋大門睇到出呢啲別具匠心嘅位置。
經過活化之後，其實呢座建築並冇太大嘅改變，當年嘅犯人欄、法院指示牌都仲保留咗落嚟。之不過，學生上堂嘅演講廳就係原先嘅法庭，至於老師嘅辦公室，就係當年嘅底層囚室，諗起都覺得盞鬼。
原圖嚟自網絡
評論：
共0 條評論