香港唯一位處內陸石刻 黃竹坑石刻

喺港島黃竹坑一個隱蔽嘅位置，一條小溪嘅旁邊，有一塊睇落平平無奇，但其實有過千年歷史嘅遠古石刻。咁都仲未夠巴閉，最威水嘅地方係，呢塊石刻係全港唯一一塊位處內陸嘅石刻，佢就係黃竹坑石刻。

呢塊巨石喺1984年被列為法定古蹟，石刻上並冇文字嘅存在，學者只可以根據石刻上嘅圖案推斷係遠古先民對神明或者大自然嘅祟拜。九大石刻及刻石之一嘅黃竹坑石刻整體嘅面積有6平方米，雖然冇辦法知道係幾時刻鑿，但考古學家就按照上面嘅紋飾推斷，同係青銅時代出土嘅青銅器紋飾類似，即係至少有3,500年歷史。

如果史友們有行過上去，都應該會記得石刻上有三組迴旋紋雕刻出來嘅紋飾，睇落有啲似動物嘅眼，石刻上嘅動物普遍嚟講都會被認為係饕餮紋，呢種古代異獸到底有咩象徵？阿史留返下篇再同史友們詳細討論。