今朝早就同史友們介紹到黃竹坑石刻，提到石刻上面幾組紋飾同三千幾年前青銅器上面嘅紋飾相當相似，而佢地都有異曲同工嘅地方，就係好似一種古代異獸嘅眼，呢種異獸就叫做饕餮（音：濤鐵）。

關於饕餮，喺古書《山海經·北次二經》入面就係咁樣形容：「其形狀如羊身人面，眼在腋下，虎齒人手。」饕餮喺《左傳》中記載饕餮為縉雲氏之子、亦有講法話佢係龍生九子入面排行第五、有兩個「食」字部首並唔係巧合，係因為呢種異獸喺古代係象徵貪圖食慾、係戰爭嘅象徵，饕餮乜都食，甚至最後食到自己飽死埋。於是呢個詞後來就用嚟形容一啲貪心嘅人。

既然佢咁恐怖，點解要用佢嚟做器物紋飾，甚至刻到石刻上面呢？原來喺古代嘅時候，禮樂文化仲未形成，對充滿戰爭嘅環境、面對住未知嘅大自然，呢種紋飾反而會令先民覺得，能夠鎮住未知嘅自然災害。亦有講法話，對先民嚟講，呢種其實係一種「尊神」嘅意識，亦都可能係商周統治者希望用青銅器紋飾嘅「恐怖」表達王權「威嚴」咁話。

原圖嚟自網絡