東西南北中 發達到廣東

話說阿史最近重溫一套播咗好多次嘅電影，叫《丐世英雄》，响電影初段有個閒角衣錦還鄉，同主角許冠文講咗句：「東西南北中，發達到廣東」，之後許冠文就帶埋幾位夥伴去咗廣東闖天下。電影內容可能係誇張啲，之但係呢句說話响八九十年代風行全國。

受惠於改革開放政策，八十年代初廣東省經濟開始起飛，好多外商（主要係港商）响廣東開設工廠，吸引左大量外省人到廣東一帶打工。人多咗自然有唔少商機，呢個亦成為唔少外省人到珠三角開展生意，响當時就叫做「搞個體」（個體戶）。就因為機遇處處，所以「東西南北中，發（財）達到廣東」就成為咗改革開放初期嘅一句口頭禪喇！

記得有次去北京有前輩就同阿史講，話八十年代個陣，啲人好鍾意有意無意講廣東腔嘅普通話，仲可能唱下廣東歌，感覺咁先夠潮。依家諗返起，《野狼DISCO》背後所講嘅應該係以往國內真實狀況。