古老清潔行業—倒夜香

早幾日就同史友們講到一份已經喺香港絕跡嘅行業—打更，隨住科技嘅發達，打更呢行古老行業嘅消息似乎係必然，而呢個時間阿史諗起一份古老嘅清潔行業，原本以為廿十一世紀已經唔存在，但偏偏仲係有咁嘅需要，呢份古老嘅行業就係倒夜香喇！

倒夜香其實一啲都唔香，呢行流傳咗幾千年嘅工種，其實係喺現代排水排污仲未發達嘅時候，由一個個倒夜香嘅工人每家每戶嘅拍門，特別係一啲舊式樓宇同埋無拉水馬桶嘅大廈，講到呢度就算幾後生嘅史友都應該會估到「夜香」其實就係大家嘅大小二便啦！

從事倒夜香嘅工人多數都係女工，而佢哋每晚都會同一架倒屎車一齊收夜香，只要大家事先將大小二便收集喺「夜香筒」，再放去樓梯位，呢班倒夜香嘅工人就會幫大家倒得一乾二淨。而所有收集返嚟嘅夜香都會用嚟堆肥畀農作物，你話幾環保呢。