幾日前阿史就同史友們介紹到倫文敘為蘇東坡「百鳥歸巢圖」題嘅一首詩,史友們都討論得好過癮,仲有位史友留言提到一首相傳係由莫宣卿出嘅上聯「閱江樓中閱江流」隔咗好耐先由倫文敘對出「映月井裡映月影」嘅下聯,而呢副聯就係肇慶閱江樓懸聯。關於呢段故事,史料嘅記載唔多,但可能史友們都有興趣想知,到底莫宜卿係何許人,可以出到一個咁耐都冇人對到嘅上聯?


莫宜卿,唔單止係兩廣第一個狀元,仲被稱為嶺南第一狀元,最巴閉嘅係,佢係隋唐以嚟科舉取士制度入面,年齡最輕嘅狀元。莫宣卿出生喺唐文宗太和八年,相傳7歲嘅時候就已經識得吟詩作賦,其中一首就係佢幼年嘅時候畀一班同輩欺凌果陣而吟出嚟嘅詩「我本南山鳳,豈同凡鳥群。英俊天下有,誰能佑聖君。」而莫宜卿12歲就已經中咗州試秀才,而去到唐宣宗大中五年,就以17歲之齡參加廷試,高舉中狀元,即時被任命做翰林書院修撰。


雖然係咁威水,但佢嘅生平事跡就冇得到太多記載,存世嘅詩作亦都唔多,而喺佢高中狀元之後,佢就表示因為掛念母親,希望可以主動去南方做地方官,當時宣宗封佢做台州別駕,而喺佢上任途中就不幸病逝,嶺南第一狀元就咁辭世。


原圖嚟自網絡