大館已婚督察宿舍 新舊融合活化？

提起「大館」，相信唔少史友都可能去過幾次打過卡，有細心留意都會發現其實呢個2018年開放嘅中區警署建築群仲未完全復修完，而早幾日馬會負責保育活化嘅團隊就宣佈會為建築群內最後一座建築物籌備復修工程，咁到底係邊一座呢？

之唔係已婚督察宿舍（第四座）囉！點解會零零舍舍得返一座建築物未復修呢？有超過170年歷史嘅中區警署建築群一共有16幢歷史建築物，由2008年起就由馬會同政府合作活化古蹟，但原來喺2016年嘅時候，已婚督察宿舍（第四座）喺工程期間部分倒塌。呢座1860年代建成嘅建築樓高三層，係當時畀警察一家做宿舍用。

咁過咗三年點解遲遲都未開始修復呢？原來係因為建築內部分磚砌、木造構件狀況惡劣，所以要探究唔同嘅可行復修方案，既要配合建築群氛圍，又要符合國際文物保育範例。而早前公布出嚟嘅方法就係用新舊融合嘅形式，既會保留倒塌部分嘅歷史原貌，亦會用新物料連接，整體設計係想呈現新同舊之間嘅關連，真係令人期待。