【講開有段故】京九直通車 通車賀回歸

受近期疫情影響，好多人都無辦法離開香港去旅行。早兩日阿史就响紅磡站見到架九龍去北京西嘅火車停咗响站內，阿史遠遠見到個車卡又諗起當年坐火車上北京。

唔知有無史友坐過京九直通車去北京或者由北京返香港呢？呢班要坐成廿幾個鐘嘅火車班次，係香港少數直達內地城市嘅火車（唔計高鐵）。唔講唔知，呢班列車嘅由來其實有段故。

話說响九十年代中，因為香港97年回歸內地掀起咗一股香港熱，唔少旅客同商務客都去香港。由於往來兩地人流大增，所以北京鐵路局就上報國家鐵道部，提出開通往來北京同香港嘅火車班次，最終國務院批准北京、上海兩大城市開通直通九龍嘅火車班次，仲要求確保响1997年7月1日香港回歸之前要開通。

1997年5月18日，首班京九直通車由北京西站出發，經過差唔多三十個鐘嘅車程，列車响第二日下午一點十分抵達香港。而香港開往北京西嘅列車就响1997年5月19日下午三點正開車，第二日夜晚20時55分抵達北京。

阿史响讀書年代，就搭過幾次火車上北京，同啲朋友廿幾個鐘困响火車上，諗返起都算係美好時光。

原圖嚟自網絡