香港首個設有男、女、兒童的公共浴廁

早排阿史就同大家介紹過幾個同太平山街鼠疫有關嘅古蹟同故事，而導致1894年鼠疫發生嘅其中一個原因，就係因為當時太多嘅人口聚居喺太平山街一帶，而且衛生環境相當惡劣，1840年代嘅《殖民地醫官報告》入面係咁樣形容：「太平山區狀甚可怖，處處是發臭的池塘……急需設立大量公廁及垃圾站……沒有比在後巷乾涸了的大量糞便所散發的氣味，更令人惡心。」

雖然話就咁話，但政府並冇即時興建公共廁所，反而係要去到疫症大規劃爆發之後，一嚟係公開投標搵人負責清理糞便，之後先喺1897年決定通過第一次公廁條例，1898年先興建第一個地底公廁。

但係，單單得公廁係未改善到衛生嘅問題，於是香港首個設有男、女、兒童嘅公共浴廁就喺鼠疫爆發後嘅10年出現，佢就係磅巷公廁。據當年嘅估計，每年呢個公廁嘅使用人數有成17萬，認真誇張。