最早消失嘅型號—第二型徙置大廈

早幾日阿史就介紹過因為石硤尾大火而興建嘅第一個政府公共屋邨—石硤尾徙置區，而隨住呢個計劃嘅發展，香港就正式踏入公共屋邨嘅時代。石硤尾徙置區係喺1954年到1960年之間逐步建成，而由於屋內嘅設施相當簡陋，令到後來做過唔少對第一型徙置大廈嘅改裝。

而去到第二型嘅徙置大廈，就係喺1961年至1964年落成，整體嘅設計其實都同H形大廈分別唔太大，只是喺「H」嘅兩邊盡頭都加上圍牆封住，令到兩邊都有一條走廊，仲可以加建樓梯，由於喺上空望落去似個「日」字，所以又有「日字型」公屋嘅稱呼。而且，喺每座大廈最尾嘅部分，都加建兩個面積有310平方呎嘅單位，專門畀擁有地契嘅寮屋拆遷戶住，亦係俗稱嘅地主房。

據當年嘅居民分享返，佢哋入住嘅時候其實屋內係冇任何間隔，都係要自已搭返個閣樓先夠位住。據1972年政府嘅統計，全港有400萬人，當中就有53萬人係住喺240座第一型同埋第二型嘅徙置大廈入面，諗起都覺得逼啊！