上幾篇文就同大家介紹咗兩位狀元：倫文敘同埋嶺南第一狀元莫宜卿，有史友就好奇，考狀元呢個制度咁複雜，到底係由幾時開始，又係點樣嚟嘅呢？阿史今日就想講一講呢個維持咗千幾年嘅科舉制度。

要知道古時嘅中國社會階級分明，唔少嘅階層都係按倫常、血緣世襲，按照天子、諸侯、卿、士分級負責管理國家。喺呢個傳統制度入面，個人嘅能力並冇得到好好嘅重視。而去到東周，就開始有啲變化，「客卿」、「食客」呢種封建制度之外嘅人材開始出現，亦都得到唔少君主嘅信服。去到漢朝，慢慢就出現埋察舉制推舉民間人材、甚至後來三國都出現埋「九品中正制」，按照人嘅出身品德等考核，亦都係科舉制度嘅前身。

講咁耐，就到科舉制度出場喇！嚟到隋代，隋文帝就決定改革原本嘅「九品中正制」，最初係喺每個州每年推薦三人應考「秀才」，呢種做法喺隋煬帝任內就進一步發展，設立埋進士科取士。

科舉制度源起隋朝，但真正發展嘅時期就係唐代，最重要嘅變化就係分成常科與制科兩類、並且允許平民自由報考，呢個做法完全顛覆咗以往「上品無寒門、下品無世族」嘅現象。科舉一直延續去到清朝，最後喺1905年先被廢除。

原圖嚟自網絡