呢排阿史就介紹過卜公花園、磅巷百年浴廁等等嘅有歷史意義嘅地方,而呢兩個建築出現嘅原因唔多唔少都同百幾年前嘅華人喺太平山街悲慘嘅生活有關,今次阿史就想同大家介紹呢座當年被稱為「人間煉獄」嘅廣福義祠。


廣福義祠嘅舊廟係建於1851年,位處太平山街40號,係由譚亞財同埋坊眾殷商要求政府撥地,喺太平山街集資興建「廣福義祠」,最初只係用嚟供奉祖先嘅祠堂,但後來由於太多離鄉別井嘅華人客死異鄉,於是義祠亦都成為一個供奉亡靈嘅地方。廣福義祠供奉住地藏王、太歲、同埋後來嘅濟公等,由於義祠內嘅逝者都有唔同嘅姓氏,所以呢度又叫做「百姓廟」。


義祠空間有限,加上管理不善,唔少無處容身嘅窮人或者等待死亡嘅病患者都紛紛搬入義祠。就係咁樣,義祠之內既有活活嘅人,亦都有冷冰冰嘅屍體,人屍共處一室。呢個情況直至1869 年,署理總登記官李斯德 (Alfred Lister) 調查一位華工嘅死先發現,當時嘅報章係用「人間煉獄」形成呢個地方。


廣福義祠喺1869年被下令封閉,1872年由東華醫院接管,恢復返原來廟宇嘅作用。


原圖嚟自網絡