嶺南係「五嶺之南」？

提起廣東，可能有史友都會知道呢個名係取自「嶺南東道、廣南東路」，講起廣東省嘅歷史同埋文化，成日都提到嶺南，到底係一個點樣嘅地域概念，當中涉及嘅範圍又有幾大呢？

嶺南，喺古代有過唔少嘅稱呼，有叫過做「百越」、「揚越」，而實際上就即係「五嶺之南」，地理範圍上嚟講，即係依家廣東、廣西、香港同埋澳門嘅全境，曾經有段時間仲涉及到湖南、江西同埋越南小部分地區，都真係幾大下。

呢個「五嶺之南」嘅地方古時係百越族聚居嘅地方，喺秦末漢初果陣，嶺南係南越國嘅轄地，由於「山高皇帝遠」嘅關係，呢一帶都比較少受到中原政局嘅影響，氣候嘅溫和令到可以用「以農為本」嘅模式發展。