繼早前提到嘅第一型同第二型徙置大廈之後,阿史今次就想介紹下1962年開始推出嘅第三型徙置大廈,呢次嘅徙置大廈睇落唔再係「H」型或者「日」字型,而係進一步改良做「I」型同埋「L」型。

以往嘅第二型嘅「日」字型設計係喺第一型「H」型大廈嘅基礎上,喺建築物嘅兩邊加建圍牆,但其實當年嘅呢種設計都仍然係要住戶用公共嘅廚廁,而且面積亦都唔大。而嚟到第三型嘅徙置大廈,就係喺第二型嘅基礎上改良。

香港政府就喺1962年率先葵涌邨徙置大廈,同一條邨就有兩種唔同類型嘅樓,分別係「I」型同「L」型設計嘅大廈,既有7到10層高嘅,又有得2、3層高嘅,就好似柴灣邨第11座、慈雲山邨第41座,就係呢類型徙置大廈嘅最矮嘅兩座。呢個年代推出嘅徙置大廈當然係未有電梯,但就有部分開始設有露台同埋獨立廁廚,而且天台嘅位置仲會有埋學校,當年嚟講真係一個幾創新嘅諗法。

第三型徙置大廈之後亦都成為第四型至第七型徙廈重要嘅參考,而去到1980年代,為咗進一步改善居民嘅生活環境,政府就決定清拆所有冇獨立廚廁嘅徙置屋邨,就係咁,呢批建築就成為回憶喇!

原圖嚟自網絡