「石壁畫龍，在佛堂門」 東龍島石刻

介紹完佛堂門嘅天后廟同埋大廟灣嘅刻石之後，今次阿史就想講下同樣位處佛堂門一帶嘅東龍島，島上面有一塊法定古蹟—東龍島石刻。

東龍島石刻係現時發現最大嘅石刻，高1.8米、長就有2.4米。由於位處海邊，行近啲就睇唔晒全貌。喺1819年王崇熙編制嘅《新安縣志》入面，就有一句關於東龍島石刻嘅記載「石壁畫龍，在佛堂門，有龍形刻於石側」，就咁睇呢句史友們大概都會理解到石刻上面刻有一個龍形圖案，但到底係乜嘢紋飾呢？原來就係一個龍形嘅圖騰，主要係以圓弧線條同埋方形迴紋組成，屬於蟠螭紋嘅類別，主要出現喺戰國時期嘅玉器上、青銅器上面。

換句話講，呢個石刻嘅出現其實係印證咗當時東龍島就已經有人類活動同生活，亦都反映咗佢哋對自然嘅畏懼同信仰。