呢兩日有唔少理應接受十四日家居檢疫嘅海外返港人士就偷偷出街,當中就有幾位媽媽唔單止冇放縱佢哋,反而仲親自舉報。呢幾位媽媽嘅行為被廣大傳媒大讚,仲形容佢哋係大義滅親,到底呢個成語背後又有一個點樣嘅故仔呢?

相關嘅故事出現喺《左傳·隱公四年》入面,相傳喺春秋戰國嘅時候,衛王衛莊公過身,佢嘅王位由懦弱嘅長子繼承,而細佬州吁就野心勃勃,成日想奪取佢嘅王位。有一日,新嘅衛王出訪,呢位細佬州吁就搵人刺殺咗衛王,偷咗呢個王位。

而喺佢繼位之後冇幾耐,佢就決定要攻打其他國家,全國上下都反對呢個決定,呢位新嘅衛王就只好搵親信石厚商量,石厚當時就諗到搵佢爸爸石碏出嚟坐陣,或者可以幫到呢件事。但石碏知道,佢個仔其實係助紂為虐,於是就設計叫衛王州吁同埋石厚一齊去搵陳桓公媯鮑幫手。

咁同大義滅親有咩關係呢?原來石碏一早寫信畀陳桓公,講明去搵佢嘅兩個都係大逆不道嘅人,希望陳王可以幫手除去佢咃。而當衛王同埋石厚去到現場嘅時候,先知自己中晒計。石碏為咗國家同人民利益,而冇去偏袒自己個仔,呢種行為就被形容為大義滅親。

原圖嚟自網絡