早幾日就同史友們介紹到嶺南呢個地域概念其實係「五嶺之南」，而呢個嶺南地區，其實就曾經出現過國家，最早為人所共知嘅就係「南越國」喇！

「南越國」其實係一個喺公元前204年到112年存在喺嶺南，定都番禺嘅一個國家，佢嘅範圍由今日嘅廣東、廣西、去到福建、香港、澳門甚至係越南，真係唔惹小。

咁到底點解好地地會出現一個國家呢？咁就要由秦朝就嚟滅亡講起。當時有個人叫做趙佗，佢喺秦朝平定嶺南之後設立嘅三郡之一，南海郡任職南海郡尉，位置大概係今日嘅越秀區。佢眼見秦朝就嚟滅亡，就自己起兵兼併埋嶺南另外兩個郡，桂林郡同埋象郡，建立咗南越國。但冇幾耐，公元前196年，佢向西漢劉邦稱臣，令到南越國可以用「外臣」嘅身份存在。

但趙佗並冇因為咁而滿足，去到公元前183年，佢就開始稱帝，仲將附近嘅閩越、夜郎、同師收入南越國，當時已經算得上係南越國最興盛嘅時候。南越國前後經歷過5位君主，以國家同「外臣」嘅身份存在咗93年，最後被漢武帝派出兵10萬消滅，但無疑嶺南文化就係喺南越國呢段時期發展起嚟。

原圖嚟自網絡