「火柴盒小學」係點嚟？

上世紀50年代，就因為一場石硤尾大火而令到當時嘅政府決定興建徙置大廈，最初第一型嘅徙置大廈設計並唔完善，但都叫做有個安身之所。而隨住呢類徙置大廈慢慢喺各區興建，相關嘅配套設施亦都開始出現，「火柴盒小學」相信唔係唔少史友成長嘅地方。

喺1960年代，政府興建第四型徒廈嘅時候，都會貼住建築物起埋學校，呢個就係「火柴盒」學校嘅前身。而後來「火柴盒」學校就被分離出嚟，呢類嘅學校其實就即係好似「I」字型嘅長條形設計，並冇特別設計同設施，早期嘅「火柴盒」學校甚至係未有禮堂。唔單止咁，內部嘅格局就只有課室同走廊，通風仲唔係幾好，但當年嚟講，學額唔夠嘅情況下，呢啲學位真係幾重要。

而呢類型嘅設計沿用到1981年為止，直到2018年為止，香港都仲有成30間呢類面積細又冇乜設計嘅「火柴盒學校」。