薄扶林村嘅歷史悠久,係香港島重要嘅古村。而呢條村唔單止有六十幾座牛奶公司嘅牧場建築,仲有一座好特別嘅塔,叫做李靈仙姐塔。

可能史友們都未必聽過,李靈仙姐塔係一座高5米嘅靈塔,據講係為咗紀念一位為薄扶林村降魔伏妖嘅仙人而建成。其實靈塔幾時起好,並冇實際嘅記載,只係依家塔上面寫住嘅「民國丙辰冬(即1916年),聯慶堂上」推斷,但呢個年份同好多古廟一樣,都有可能係重修嘅年份。

李靈仙姐塔主要分成兩層,用紅磚建成六角型嘅塔身,每面都有一個圓拱形嘅窗,而入面就係供奉住李靈仙姐嘅神位。講咁耐,到底李靈仙姐係邊個呢?據早年薄扶林村嘅居民所講,原來薄扶林村就曾經傳出有鬼怪出沒,經常都會聽到怪聲見到鬼影,而有一次就有居民話艼到一位叫做「李靈仙姐」嘅女仔話會幫佢哋趕走鬼怪。點知就咁岩得咁橋,自此之後村落就風平浪靜,再冇奇怪嘅事發生,於是村民就決定興建呢座靈塔以表謝意,亦都希望從此以後村內再唔會有邪污鬼物。

於是,李靈仙姐就成為村內獨有嘅信仰,每年農曆四月十五都仲會有祭祀活動喺度舉行,而中秋舞火龍之前,村民亦都會喺塔前舉行祭祀儀式,相當傳統。

原圖嚟自網絡