荷蘭畫家梵高冥壽 1884年作品《春日花園》被盜

話就3月30日係荷蘭畫家梵高嘅冥壽，相信唔使阿史介紹，史友們應該都會對呢位表現主義嘅印象派畫家有啲認識。提起梵高，唔單止會諗起《星夜》、《向日葵》、《有烏鴉的麥田》呢幾幅經典作品，仲會有《春日花園》，而呢幅畫兩日之前就响荷蘭阿姆斯特丹以東嘅拉倫辛厄爾博物館被偷。

梵高嘅一生短暫，先後做過國際藝術品交易商公司同埋傳教士嘅佢，其實喺27歲先開始佢嘅畫家生涯，但短短十年之間佢就畫咗差唔多2,100幾幅畫作，但當時佢嘅作品並未有太多人識得欣賞，而佢亦都深受精神病折磨，最尾响37歲嘅時候自殺。

呢幅《春日花園》，其實就係1884年完成，全名係《春日花園，紐恩南牧師畫院裡的春天》（Spring Garden, Parsonage Garden at Neunen in Spring），當時係描繪梵高喺爸爸間屋望出教堂嘅景象。博物館知道呢個消息後，都表示好驚訝，同時都相信係由專業嘅犯罪者偷走，呢幅畫作就估計價值855萬至5133萬港元。