就喺前日(3月31日)，前廉政專員施百偉（Bertrand de Speville）辭世，呢位傳奇人物曾經係1993年至1996年間香港廉政第7任嘅廉政專員，亦都係香回歸之前最後一位外藉嘅廉政專員。對於施百偉嘅離世，現任廉政專員白韞六就代表廉署發聲明，表示相當悲痛，仲形容施百偉係一位「堅毅、深具遠見的領袖和謙謙君子。」

施百偉1941年出生喺英屬南羅得西亞，喺1981年加入香港政府，先後做過律政署副首席檢察官、首席檢察官，去到1991年至1993年期間，佢就出任過法律政策專員。而講到佢為人所共知嘅，當然就會係1993年至1996年期間擔任嘅廉政專員。

而講到最觸目嘅事件，就係喺佢上任廉政專員嘅時候就引用《廉政公署條例》，將當時第一位廉政公署執行處華人副處長徐家傑炒魷，最後仲令到立法局引用權力及特權法調查成件事。廉署並冇向公眾交代當中原因，但去到1994年立法局就認為相關嘅決定係合理。

施百偉任內仲成功偵破多宗複雜精密嘅跨境商業貪污案件，果段日子算得上係廉署最艱難嘅時刻。而喺1997主權移交前，佢更加同內地嘅反貪機構建立更加緊密嘅合作關係。而喺佢卸任廉政專員後，佢就先返到英國經商，創立反貪污顧問公司，繼續為唔同地方嘅政府同埋機構提出反貪措施。

原圖嚟自網絡