旺角天眼係點樣嚟？

呢兩日油尖旺區議會就發生咗一件事，會上就通過拆除前旺角行人專用區嘅天眼系統，但呢個決定就受到民政事務處反對，原因真係講開有段故，係同2008年幾單恐怖嘅高空擲物有關。

喺2008年嘅時候，其實西洋菜南街都仲係行人專用區，唔單止多行人，仲有唔少商販都固定會喺呢個區域入面擺檔表演，於是就長期會聚集到好多人喺呢個行人專用區入面停留。咁問題就嚟喇，一多人停留，假如有啲乜違法傷人嘅事件，都好易令到一班人受傷。

而當年就發生過多次嘅高空投擲鏹水彈事件，但由於早年旺角樓宇密集，再加冇足夠嘅閉路電視監察，於是咁多年嚟警方都搵唔到犯罪者，三次事件一共令到100人受傷。最後，油尖旺區議會就建議喺現場兩座大廈高處安裝俗稱「天眼」嘅錄影機，喺2009年6月正式啟用。