尋日洲際酒店就宣佈會進行全面翻新，成個工程由2020年4月20日開始，將所有客房、餐廳及酒店外牆進行為期30個月嘅工程，當中大部分員工都被遣散，而2022年重開嘅酒店，將會用返「麗晶」呢個名。

提起「麗晶酒店」，相信史友們都唔會陌生，特別係有睇過《國產凌凌漆》嘅史友，應該都會記得其中有一幕就係星爺以及自己會住麗晶酒店，但點知其實係麗晶大賓館。而當年未改名前嘅洲際，其實就係叫麗晶酒店，係香港數一數二嘅大酒店。

原址係藍煙囪貨倉碼頭嘅洲際酒店，係1980年開業，當時屬於新世界中心嘅一部分，由於面向維多利亞港海景，附近又係星光大道，呢啲因素都令佢成為香港甲級嘅高價酒店。而去到2001年，新世界集團就因為財困而將尖沙嘴麗晶酒店賣咗畀英國酒店集團巴斯酒店（Bass Hotels and Resorts），亦即係洲際酒店集團嘅前身。

而去到2014年，當時盛傳有買家用成80億港幣去買洲際酒店，但最尾係由基滙資本同埋建生國際以72億買到洲際，按當時嘅估價，即係每間酒店房價值1447萬，而被收購嘅洲際酒店仍然係由洲際酒店集團管理。

原圖嚟自網絡