電燈杉掛老鼠箱

阿史晏晝同波士、秘書一齊去買飯，喺街度就見一對情侶，男嘅有成2米高，女嘅就目測1米5左右，波士就失驚無神彈咗句「電燈杉掛老鼠箱」，秘書當堂黑人問號咁嘅樣，仲走嚟問阿史點解，阿史就當然知道啦！

「電燈杉掛老鼠箱」呢個詞真返咁上下歷史，依家普遍都係用嚟形容男女之間嘅身高懸殊，但喺以前嘅街邊，就真係有呢個場景出現。電燈杉係咩相信都唔使阿史再解釋，而自從1884年嘅太平山街鼠疫之後，香港每隔幾年都仲有鼠疫爆發，而衛生部門就發現原來老鼠身上嘅虱係會將病菌帶到人嘅身上，於是就設計咗呢種密封嘅鐵箱用嚟收集死老鼠。

而呢啲鐵箱就會掛喺每條街嘅電燈柱上面，由於早年嘅電燈柱都係用木整成，所以又叫做「電燈杉」。咁同情侶又有乜關係呢？原來呢兩樣物件配合埋一齊，會顯得電燈杉極高，而老鼠箱極細，呢種強烈嘅對比就被人叫做「電燈杉掛老鼠箱」。