大埔係新界行政中心？

記憶中唔少史友都係新界友，單係睇佢哋對新界嘅熟悉程度就略知一二。記得以前都介紹過一啲大埔嘅歷史，亦去過舊北區理民府、舊大埔警署影下相，而大埔元洲仔個度亦有前政務司官邸。咁史友們又有無諗過，點解大埔會有咁多以前政府機構嘅建築物呢？

原因好簡單，就係响英國租借咗新界之後，佢哋選擇咗大埔為新界地區嘅行政中心。其實响1898年之前，大埔呢個地方已經有一定嘅發展程度，有漁港又有墟市，地理上亦係新界嘅中心位置，所以連殖民地政府舉行接管新界嘅升旗儀式都係响大埔進行。當時主理新界事務嘅（舊）北區理民府就係响大埔，（舊）大埔警署一直被用作新界警察總部。

時至今日，呢啲殖民地時代留低落嚟嘅建築，唔少已經成為咗法定古蹟，當中就包括咗舊北區理民府、舊大埔警署以及位於吐露港元洲仔嘅前政務司官邸等。