今年復常通關後，漸漸多咗旅客嚟香港玩，所以呢幾個月山頂响周末時候都人山人海。當然！上得山頂自然會有人話去山頂老襯亭。
老襯亭可以話係太平山頂一個標誌性景點，最初嘅老襯亭就响上世紀二十年代出現，原名為鮑寧亭，係山上一個觀景亭，而呢個亭嘅位置就唔係响纜車站附近。不過，呢個初代老襯亭就响香港日治淪陷期間被爆毁。到咗1955年，第二代老襯亭就重新出現，呢個觀景亭位置就設响山頂纜車站旁邊，其實就同第一代老襯亭無乜關係，因為多咗人上山頂玩，因此呢個地方漸漸成為咗香港人去睇風景嘅地方。至於點解叫老襯亭呢？有一個講法就話啲人山長水遠上山頂睇風景，係笨人所為，就形容呢個地方搵老襯。亦因為有咗老襯亭呢個稱呼，搞到連鮑寧亭都被稱為第一代老襯亭。
原圖嚟自網絡