上次講過唔少各行各業嘅人士利用工餘時間做輔警,一展抱負,當中包括眼科醫生譚德祐,譚醫生朝早返醫院睇症,中午就會變身譚sir,返警署履行輔警工作,下晝再返診所工作。佢話雖然自己好忙碌,但從來都無諗過放棄,仲話好鍾意呢兩個身份,如果無咗是但一個都會好唔自在。

譚醫生當年讀醫科嘅時候就加入咗輔警隊,至今已經20幾年。譚醫生曾經分享過一啲趣事,話說喺初初做輔警嘅時候,曾經有位60幾歲嘅獨居婆婆報警,話屋企有賊。譚sir接報到場之後,個婆婆就話屋入面有鬼,匿咗喺譚sir後面,譚sir睇得出佢有精神問題,於是就用一個膠袋作狀捉鬼,個婆婆見到之後就覺得好滿意,譚sir最後梗係勸佢去睇醫生,婆婆應承之後,自此無再報警。

除咗譚sir之外,唔少輔警都有唔同嘅專業背景,就好似而家嘅一哥、輔警總監楊祖賜,正職係新鴻基地產發展有限公司嘅市務總監,亦係業餘嘅射擊運動員,响2008年東南亞射擊錦標賽喺隊制同個人賽中,贏得1銀3銅嘅成績。而永安百貨郭氏家族後人、建築師郭志舜亦都做過輔警總監。

原圖取自網絡。