唔知史友們有無留意，銅鑼灣Cinema CityJP戲院宣布月尾結業，呢個位無咗戲院硬係好似少咁啲嘢咁，不過年代巨輪不斷轉動，都無辦法。
呢間戲院所在位置，昔日都係一間戲院，而且仲係銅鑼灣最著名嘅戲院之一，就係翡翠明珠戲院。銅鑼灣翡翠戲院係响1969年開幕，由邵氏電影集團所擁有同經營，响初期專放邵氏院線上映嘅電影，由電影製作到放映都係邵氏一手包辦，六叔就似乎諗到呢條橋賺到盡。得意嘅係，當時「翡翠」同「明珠」播嘅電影係唔一樣，「翡翠」早期以放映邵氏電影為主，而「明珠」就長期主力外語片，情況就同大台「翡翠台」同「明珠台」差唔多。後嚟「翡翠」後期轉為上映德寶院線電影，之後再上其他院線嘅電影。講到「翡翠」同「明珠」，唔少老友記都應該記得個超弧型大銀幕，以及超等座，阿史記得座位最前排嘅前面係下一層，細個個陣見到成日驚跌咗落去。
講多少少，當年上張正甫爺爺嘅堂個陣，佢就話六叔果陣同佢講珠成大廈同翡翠明珠戲院呢個項目，六叔就話賣樓好過拍戲。睇嚟六叔當年應該賺咗唔少。
原圖嚟自網絡