記得以前讀書嘅時候,聽見有同學去咗做輔警,不過成班朋友都係後尾先對輔警有深入認識。驟眼睇落去輔警嘅制服同裝備都同正規人員差唔多,一樣配備點三八左輪手槍、十二發子彈、警棍同胡椒噴劑,唯一分別就係輔警嘅肩章有個A字做識別。唔講唔知,原來做輔警嘅人工都唔差,依家一個警員職級嘅輔警時薪有成96蚊、日薪768蚊,唔怪之得咁多大學生走去做輔警!

輔警隊早喺1914年成立,遲過正規警隊成立70年,成立輔警隊嘅目的,係為咗提供訓練有素嘅後備人手,喺有需要嘅時候支援正規人員。喺1959年,《香港輔助警隊條例》獲得通過,成立一支囊括第一同二次世界大戰時嘅志願警察、後備警察同埋原有輔警嘅隊伍。雖然輔警隊由警務處管轄,但原來根據法例,警務處長只係代特首管理輔警隊,而輔警總監同副總監都係由特首委任嘅。

輔警總部同訓練基地位於九龍灣宏照道,成為輔警前學員需要接受350小時嘅訓練,內容包括法律、警察實務、程序、警察規則、規例及步操等,另外亦需要喺香港仔警察學院同靶場接受武器同戰術訓練,完成後同正規警員一樣會有結業會操。

原圖取自網絡。