近幾日阿史都同史友們介紹咗紀曉嵐同埋和珅喺歷史上嘅真實形象,而呢兩位歷史人物之所以可以咁引起到大家嘅興趣,唔多唔少都係同以前嘅一套電視連續劇有關,呢套劇就係《鐵齒銅牙紀曉嵐》。

《鐵齒銅牙紀曉嵐》相信真係幾代人嘅共同回憶,呢套電視劇講述紀曉嵐、和珅、乾隆、杜小月之間趣事又帶查案情節、劇中又運用咗大量中國古樂配樂、引用文言、詩詞、對子,當年2001年就播出第一部,唔單止係國內,就連喺香港都大受歡迎。當中主角演員張國立、王剛、張鐵林就被稱為「鐵三角」,呢三位演員嘅合作亦都相當有火花,甚至劇集本來打算拍到第三部就結束,最後亦都順應要求開拍第四部。

咁當然,電視劇始終都係電視劇,唔少情節都係同史實唔一樣,例如劇中三位主角歷史上年紀差異相當大、又例如和珅同埋紀曉嵐嘅關係其實唔差,又例如和珅歷史上其實儀表俊雅而紀曉嵐反而相貌丑陋,真係估佢唔到。

原圖嚟自網絡