Danny陳百強响上世紀七八十年代紅極一時,又有才華又靚仔。不過,人紅自然多新聞,當年有套戲就係有一啲關於佢同哥哥張國榮嘅花邊。

話說當年佢哋兩位年輕偶像都參演一套電影,呢套戲叫《聖誕快樂》,係由新藝城响1984年推出嘅作品,導演係高志森。呢套戲演出嘅除咗陳百強同張國榮,仲有麥嘉、徐小鳳,响當時嚟講係相當大卡士,而且當年亦相當賣座。不過,後嚟有人發現,陳百強同張國榮响電影內戲份相當多,但就好似無對手戲。多年後導演高志森提起呢件事時,就話當時佢搵陳百強同張國榮拍呢套戲時,佢兩個不約而同話可以拍呢套戲,但唔可以同場或見到對方。為咗解決呢個問題,高志森就將佢兩個嘅戲份分開嚟拍,之後先剪返埋一齊,有幾場戲好似張國榮送架車俾麥嘉,仲有最後一幕聖誕舞會,都係以「一山不能藏二虎」方式分開拍。老老實實,唔講都真係唔係好覺。

原圖:電影《聖誕快樂》劇照