近年好多人放假都鍾意行山,不過真係要萬事小心、做足準備,平時市民遇到意外,主要都係由民眾安全服務隊(民安隊)出動拯救嘅。同其他紀律部隊一樣,佢哋當值期間都有唔少難忘經歷,好似幫越南船民搞聯誼活動、搵唔到失蹤人士嘅去向等,其實佢哋嘅職責同新鮮滾熱辣電視劇《白色強人》嘅醫生一樣,都係爭分奪秒拯救生命。

民安隊係保安局轄下嘅志願輔助應急隊伍,現時有3700幾名成人隊員,以及4000幾名12至17歲嘅少年團員。民安隊本身响1952年成立,當初係備戰嘅民防單位嚟,後來經過多年發展,先慢慢變成而家一支多元化嘅輔助組織,喺天災人禍發生嘅時候執行應急服務,減輕紀律部隊負擔。民安隊成員大多有正職在身,或者係自僱人士,例如小巴、的士司機等等。而前民安隊處長李樹榮嘅正職係運輸署嘅城市規劃師,佢仲做過運輸署嘅副署長添,認真犀利!

話說李樹榮70年代大學畢業之後就加入民安隊,曾經喺越南難民營守夜,為船民搞聯誼活動,安排醫生、幫手買豉油、魚露等等,又試過跟隨英軍訓練,學習由直昇機游繩著地等技術。佢曾經提過,80年代有法籍青年喺大埔八仙嶺失蹤,當時佢帶隊搜索、用開山刀闢路,仔細搵過但都無功而回,直至若干年之後嘅一場大雨,先至令嗰位青年被發現,但已經成為一堆白骨。所以大家行山還行山,一定要注意安全!

圖片為民安隊山竹襲港善後工作,取自網絡。